🇱🇰 68வது இலங்கை சுதந்திர தினத்தை முன்னிட்டு ஜமாஅதுஸ் ஸலாமாவின் தலைவர் விடுத்துள்ள செய்தி

68வது இலங்கை சுதந்திர தினத்தை முன்னிட்டு ஜமாஅதுஸ் ஸலாமா இலங்கை வாழ் அனைத்து மக்களுக்கும் தமது வாழ்த்துக்களைத் தெரிவித்துக் கொள்வதில் மகிழ்ச்சி அடைகின்றது.

இன்றைய தினம் இலங்கை மண்ணில் வாழும் அனைத்து மக்களுக்கும் விஷேட நாளாகும். இன, மத, மொழி வேறுபாடில்லாது அனைத்து இலங்கை பிரஜைகளும் இத்தினத்தை கொண்டாடுகின்றனர்.

சுதந்திரம் என்பது விலைமதிக்க முடியாத ஒரு அம்சம். இதனைப் பெற்றுக் கொள்வதற்காக எதனைத் தியாகம் செய்தாலும் அது வீணாகாது. இவ்விடத்தில் சுதந்திரத்தைப் பெற்றுக் கொள்வதற்காக எமது மூதாதையர்கள் செய்த தியாகங்கள் நினைவு கூறப்பட வேண்டும். நாட்டின் இறைமைக்காக அவர்கள் அயராது உழைத்தவர்கள். நாம் அதன் காற்றை இன்று சுவாசிக்கின்றோம்.

சுதந்திரம் என்ற கருப்பொருள் அந்நிய நிர்வாக ஆதிக்கத்தில் இருந்து நாட்டை விடுவித்தல் என்ற நேரடிக் கருத்தில் பாவிக்கப்படுகின்றது. எனினும், அந்நிய ஆதிக்கம் என்பது பல கருத்துக்களை கொண்டுள்ளது. அது அந்நிய அரசியல் ஆதிக்கம், கல்வி கலாச்சார ஆதிக்கம், பொருளாதார, இராணுவ ஆதிக்கம் என பல வடிவங்களைப் பெற முடியும். இவற்றிலிருந்தும் நாட்டை விடுவித்தல் முக்கியமானது.

அதே போன்று மத சுதந்திரம், எழுத்து பேச்சு சுதந்திரம் பாதுகாக்கப்பட வேண்டும். வரையறைகளை மீறாது விமர்ச்சிக்கும் ஆரோக்கிய சூழல் காணப்படுவது சுதந்திரத்தின் ஒரு அடையாளம். ஊடக சுதந்திரத்திற்கு உத்தரவாதம் இருக்க வேண்டும். அதே நேரம் அதனை பிழையாகவும் பயன்படுத்தக் கூடாது.

இன்றைய எமது கடமை பாரியது. நாட்டை அபிவிருத்தி, வளர்ச்சிப் பாதையில் கொண்டு செல்வதில் ஒவ்வொரு பிரஜைக்கும் கடமையுள்ளது. பொதுச் சொத்துக்களை நாம் முறையாகப் பயன்படுத்த வேண்டும். அவற்றை உரிய முறையில் பாதுகாக்க வேண்டும்.

இலங்கை வளம்மிக்க ஒரு அழகிய தேசம். அதன் நீர் வளம், நில வளம், காட்டு வளம் பாதுகாக்கப்பட வேண்டும். தேசிய உற்பத்திகளை நாம் நேசிக்க வேண்டும். அதன் உற்பத்தியாளர்களை உற்சாகப்படுத்துவதன் மூலம் எமது உற்பத்திகளின் தரத்தை அதிகரிக்க முடியும். பொருளாதார மேம்பாட்டை ஏற்படுத்த முடியும்.

எம் இலங்கை நாடு சர்வதேச அரங்கில் புகழ் பெற வேண்டும். நல்ல முன்மாதிரிகளுக்கான நாடாக இலங்கை போற்றப்பட வேண்டும். அநீதி, அராஜகம், சுரண்டல் குறைந்த நாடாக இலங்கை மண் மாற வேண்டும். நல்லாட்சிக்கு முன்னுதாரணமாக இலங்கையை மாற்ற வேண்டும்.

இதற்காக உழைப்பது நாட்டின் ஒவ்வொரு பிரஜையின் மீதும் உள்ள கடமையாகும். நாட்டை நேசித்து அதன் வளர்ச்சிக்காக கைகோர்த்து செயற்படுவோம். நாட்டின் கீர்த்தியை பாதுகாத்து அமைதியான சூழலை ஏற்படுத்துவோம். முழுமையான சுதந்திரத்தை அனைவரும் அனுபவிப்போம்.

உஸ்தாத் ஆஸாத் அப்துல் முஈத்

தலைவர்
ஜமாத்தஸ் ஸலாமா

04.04.2016🇱🇰